Si ndikojnë rrushi dhe bananet në sheqerin në gjak

Sipas dietologëve, as rrushi e as bananet, nuk janë të dëmshme për sheqerin në gjak.

Konsumimi i frutave të freskëta çdo ditë është zgjedhje e zgjuar për shëndetin dhe mund të ndihmojë edhe në parandalimin e diabetit të tipit 2. Edhe pse rrushi dhe bananet ndikojnë pak më ndryshe në nivelin e sheqerit në gjak, të dyja mund të jenë pjesë e një diete të balancuar.

Si ndikon rrushi në nivelin e sheqerit në gjak?

Rrushi ka më pak fibra dhe përmban relativisht më shumë sheqer për sasinë e tij. Kjo do të thotë se mund të shkaktojë rritje më të shpejtë dhe më të theksuar të sheqerit në gjak krahasuar me disa fruta të tjera.

Një tjetër faktor i rëndësishëm është sasia.

Rrushi është shumë i lehtë për t’u konsumuar “pa e kuptuar”, prandaj porcioni bën diferencën.

Një racion (rreth 2/3 filxhan) përmban afërsisht 17 gramë sheqer. Megjithatë, për shumicën e njerëzve të shëndetshëm, kjo rritje është e lehtë dhe e përkohshme.

Si ndikojnë bananet në sheqerin në gjak?

Bananet japin energji më të qëndrueshme, por efekti i tyre varet nga pjekuria.

Bananet që janë të gjelbra, pra pak të papjekura përmbajnë më shumë niseshte rezistente, e cila tretet më ngadalë dhe ndihmon në mbajtjen stabile të sheqerit në gjak, si dhe rrit ndjesinë e ngopjes.

Ndërsa bananet shumë të pjekura (me njolla kafe) kanë më shumë sheqerna të thjeshta, që mund të rrisin më shpejt nivelin e sheqerit në gjak.

Megjithatë, ato përmbajnë edhe fibra (rreth 3 gramë në një banane mesatare), të cilat ngadalësojnë përthithjen e sheqerit.

Cili është më i mirë?

Sipas ekspertëve, nuk ka një fitues të qartë.

Për shumicën e njerëzve pa diabet, trupi e menaxhon shumë mirë rritjen e sheqerit pas konsumimit të frutave.

Zgjedhja varet më shumë nga nevoja juaj:

-Nëse ju duhet energji e shpejtë (p.sh. para aktivitetit fizik), rrushi është zgjedhje më e mirë

-Nëse doni të ndiheni të ngopur për më gjatë, bananet janë më të përshtatshme

Si ta mbani më të qëndrueshëm sheqerin në gjak?

Zgjidhni fruta të plota, jo lëngje

Kombinojini me proteina ose yndyra të shëndetshme (p.sh. arra)

Bëni aktivitet fizik rregullisht (edhe një ecje 10-minutëshe pas ushqimit ndihmon)

Konsumoni vakte të balancuara

Rrushi dhe bananet ndikojnë ndryshe në sheqerin në gjak, por asnjëri nuk është problematik për shumicën e njerëzve.

Përkundrazi, ato janë të pasura me vitamina, fibra dhe lëndë ushqyese që mbështesin shëndetin e përgjithshëm.