Ansel Elgort, 31-vjeçari i njohur për rolet në “The Fault in Our Stars dhe The Goldfinch”, është bërë baba, sipas burimeve të konfirmuara për People. Konfirmimi erdhi pasi aktori u pa publikisht duke mbajtur një foshnjë gjatë një daljeje në New York City.
Detaje rreth foshnjës nuk janë bërë të ditura deri më tani, përfshirë emrin dhe gjininë e saj. Vetë Elgort nuk ka komentuar publikisht mbi prindërimin.
Ai u fotografua më 13 janar duke bërë punët e përditshme në qytet, me foshnjën të lidhur në gjoks. Pavarësisht këtij momenti të rëndësishëm në jetë, aktori dukej i qetë dhe i veshur thjeshtë për një shëtitje dimërore, me pantallona të zeza prej lëkure, çizme të zeza dhe një pulovër blu e bardhë.
Elgort ishte shoqëruar nga një grua misterioze, e veshur me xhinse, bluzë të zezë dhe një jakë të bardhë të shkurtër. Më vonë, ata u panë duke udhëtuar së bashku me metronë, ku takuan dy persona më të moshuar, të cilët besohet të jenë prindërit e gruas.
Aktori është i njohur për ruajtjen e jetës private, sidomos në vitet e fundit. Ai ka pasur më parë një lidhje të gjatë me balerinen Violetta Komyshan, me të cilën u takua si adoleshent në LaGuardia High School në New York dhe kanë qenë shpesh të shfaqur në evente publike dhe premierë. Lidhja e tyre përfundoi zyrtarisht në nëntor 2022, pas thashethemeve që kishin filluar në gusht të po atij viti, kur Elgort u fotografua duke u puthur me një grua tjetër.