-
Nga:
Arsim Maxhera
- 25 qershor 2019 10:26
- Shpërndaje në:
Më 1 qershor në “Wanda Metropolitano” të Madridit u mbyll edicioni 2018/19 i Ligës së Kampionëve në futboll, i garës elitare të klubeve evropiane dhe po ashtu i garës bindshëm më të popullarizuar në kontinent.
Të martën, më 25 qershor (sot), kthehen në skenë ndeshjet e “Championsit”. Jo të fazës grupore apo të fazave nokaut që vijnë pas grupeve, por të fazës fillestare të kësaj gare - raundit paraeliminator.
Edicioni i ri i Championsit 2019/2020 nis shumë larg prej Madridit dhe me skuadra larg cilësisë që kanë Liverpooli e Tottenhami, finalistët e 1 qershorit. Në stadiumin "Fadil Vokrri" në Prishtinë luajnë kampionët e katër vendeve të fundit në ranglistën e UEFA-s, Gjibraltarit, Andorrës, San Marinos e Kosovës. Nga ora 15:00 takohen Tre Penne e San Marinos me Santa Coloman e Andorrës, ndërsa nga ora 20:45 luajnë Feronikeli me Lincoln Red Imps të Gjibraltarit.
Për herë të parë Kosovës i është besuar organizimi i turneut parakualifikues i Ligës së Kampionëve. Nga një ndeshje e kësaj gare është luajtur në stadiumin "Adem Jashari" në Mitrovicë. Dy vjet më parë Trepça '89 debutoi nga Kosova në "Champions". Atëbotë nuk kishte raund parakualifikues, ndërsa skuadrat inferiore nisnin garën nga raundi i parë kualifikues. ‘89-shi u përball me Vikingurin e Ishujve Faroe. Humbi 2:1 në Torshavn dhe kishte shpresë se në ndeshjen e kthimit do të ndodhte përmbysja e madhe. Por në Mitrovicë më 4 korrik 2017, "xehetarët" dëshpëruan duke pësuar 4:1 dhe duke mbyllur shumë herët aventurën evropiane.
Para një viti u përfshi raundi paraeliminator dhe prej këtij ndryshimi në format përfitoi Drita e Gjilanit. Turneu i raundit paraeliminator ishte luajtur në Gjibraltar, ndërsa Drita me fitore ndaj Santa Colomas në gjysmëfinale dhe ndaj Lincolnit në finale kishte kaluar në raundin e parë kualifikues. Drita në Mitrovicë kishte pësuar 3:0 nga Malmo, ndërsa në Suedi 2:0 dhe kështu ishte eliminuar nga "Champinsi" për të vazhduar garën në kualifikimet e Ligës së Evropës.
Tani është radha e Feronikelit të Drenasit për të bërë debutimin në "Champions" dhe për të tentuar të bëjë hap para. Zhvillimi i turneut parakualifikues në Prishtinë vlerësohet rrethanë favorizuese për kampionin e Kosovës... (Më gjerësisht lexoni në Koha Ditore)