Dhjetë ligje në një seancë

Brenda një dite, Kuvendi i Kosovës i ka miratuar dhjetë ligje, përfshirë ato për sigurimet shëndetësore dhe për çmimet tavan. Shqetësim për korrupsion të mundshëm ka ngritur opozita gjatë diskutimit për Ligjin për Lojërat Mesdhetare, organizimi i të cilave në vlerë të 254 milionë eurove do të bëhet duke shmangur procedurat e rregullta të prokurimit publik. Që ligji të mos miratohet në këtë mënyrë, deputetëve u ka bërë thirrje edhe Bashkimi Evropian

Të dhjetë projektligjet që Kuvendi i ka pasur në rend dite, i ka miratuar brenda disa orëve në seancën plenare të së enjtes.

Disa janë kaluar me mbështetje të opozitës e disa veç me votat e koalicionit në pushtet.

Mes tjerash, miratim kanë marrë Ligjet për çmimet tavan, për sigurimet shëndetësore, për Lojërat Mesdhetare 2030 dhe për banimin social e të përballueshëm, të cilat kanë nxitur debat mes pushtetit dhe opozitës.

Por paraprakisht, seanca ka nisur me një deklarim të kryetares së Kuvendit, Albulena Haxhiu, e cila e ka dënuar gjuhën që e ka përdorur deputeti i Lëvizjes Vetëvendosje (LVV), Fatos Geci, gjatë seancës së kaluar kundër udhëheqësve të Ushtrisë Çlirimtare (UÇK) që aktualisht ndodhen në Hagë dhe kundër deputetes së Partisë Demokratike (PDK), Vlora Çitaku.

“Si kryetare e Kuvendit e dënoj pa asnjë mëdyshje këtë gjuhë. Nuk do të lejoj që foltorja e Kuvendit të përdoret për sulme të tilla. Po, le të debatojmë me argumente, me ide por assesi me qëndrime që e cenojnë luftën tonë çlirimtare dhe ata që i dolën Zot këtij vendi”, ka theksuar ajo para deputetëve.

Para se deputetët t’ia jepnin miratimin në lexim të dytë Projektligjit për Masat e Përkohshme të Produkteve Themelore në Raste të Veçanta të Destabilizimit në Treg, në seancë ka pasur debat midis ministres së Tregtisë dhe deputetëve të opozitës.

Në rrethana kur mund të ketë destabilizim të tregut, këtë mandat do ta kryejë një bord i pavarur, për pavarësinë e të cilit opozita ka shprehur dyshime.

“Çka është destabilizimi i tregut? Sa duhet të devijojnë çmimet në treg që ne të konstatojmë që ka destabilizim të tregut? Kush ka diskrecion të llogarisë kostot dhe të përcaktojë me pas çmimet tavan?”, ka theksuar deputeti i Lidhjes Demokratike (LDK), Avdullah Hoti.

Në debat është përfshirë edhe deputeti i PDK-së, Arben Mustafa.

“Ministre me këtë projektligj ke me e mbrojtë qytetarin aq sa e keni mbrojtë nga rritja e çmimit të naftës. Tjetra: pse nuk po ia lini Kuvendit procedurat e përzgjedhjes së kandidatëve për anëtarë të bordit”, ka theksuar ai.

E atyre, përgjigje u ka dhënë ministrja Mimoza Kusari-Lila.

“Ideja dhe moduli më i qasshëm dhe lehtë i zbatueshëm dhe kushtetues ka qenë bordi, që përzgjidhet me konkurs të hapur nga Qeveria dhe me votim nga Kuvendi, dhe shumicën e pakicën në Kuvend e përcaktojnë zgjedhjet”, ka thënë ajo.

Diskutim është zhvilluar edhe për Projektligjin për sigurimet shëndetësore.

“Jam i sigurt që qytetarët shpejt do të bëhen me sigurime shëndetësore”, ka thënë ministri i Shëndetësisë, Arben Vitia.

E deputetë të partive në opozitë kanë shprehur skepticizëm për implementimin e këtij ligji e po ashtu kanë dhënë edhe komente se është shtyrë përpara votimi i tij me shpejtësi për qëllime elektorale.

“E përfundove duke thënë që shumë shpejt do ta kemi sigurimin shëndetësor. Duke qenë se je për një kohë të gjatë ministër, a beson se e ke dijeninë dhe aftësinë të na tregosh kur është ajo shumë shpejt?”, është shprehur deputeti i PDK-së dhe ish-ministri i Shëndetësisë, Uran Ismaili.

Deputeti nuk ka marrë përgjigje, porse ligji i ka marrë 80 vota për.

E për Ligjin për Lojërat Mesdhetare 2030, në debat është përfshirë edhe kryetarja e Kuvendit.

Deputetët e opozitës kanë shprehur shqetësimin se si me këtë ligj pushteti ka lejuar anashkalimin e legjislacionit të prokurimit publik, për menaxhimin me 254 milionë euro buxhet për organizim të këtyre lojërave.

“Kur edhe BE-ja ngre shqetësim për mënyrën se si po tentohet të kalohet një ligj i tillë, atëherë natyrisht se alarmi duhet të ngrihet për secilin deputet në këtë Kuvend, edhe për ju si kryetare e Kuvendit”, ka thënë Blerta Deliu-Kodra, e cila është deputete e PDK-së.

“Nuk mund ta marr më tepër parasysh një letër të Zyrës së BE-së sesa vullnetin e qytetarëve të shprehur në Kuvend. Për mua kjo është e rëndësishme. E kam takuar përfaqësuesen e BE-së, i kam thënë nuk jemi në rrethana normale. Ju ftoj që të bëheni zëdhënës të qytetarëve dhe jo zëdhënës të Zyrës së BE-së, sepse ata i kanë zëdhënësit e tyre”, është përgjigjur kryeparlamentarja Haxhiu.

Me gjithë pakënaqësitë, projektligji është kthyer në ligj me 64 vota për. Nga fillimi i kësaj legjislature janë miratuar 11 ligje dhe 16 marrëveshje ndërkombëtare.

Kuvendi i Kosovës të premten do të mbajë edhe dy seanca të tjera. Seanca e parë, e cila do të jetë në shenjë nderimi për kongresistin e ndjerë amerikan, Eliot Engel, do të mbahet nga ora 10:00. Engel, i cili ka qenë mbështetës i madh i Kosovës, ka vdekur më 10 prill në moshën 79-vjeçare.

E nga ora 11:00 do të mbahet seancë plenare, ku në rend dite do të jenë marrëveshje ndërkombëtare, por edhe zgjedhja e anëtarëve të Këshillit Gjyqësor (KGJK), të anëtarëve të Bordit të Radiotelevizionit të Kosovës (RTK) dhe anëtarëve të Komisionit të Pavarur për Media (KPM). Do të shqyrtohet po ashtu një propozim-rezolutë për avancimin e përkujdesjes institucionale ndaj komunitetit shqiptar në Preshevë, Medvegjë e Bujanoc, në përputhje me standardet evropiane.

Qeveria procedon në Kuvend Projektligjin për ndryshimin e buxhetit

Qeveria e Kosovës ka njoftuar të enjten se ka mbajtur një mbledhje elektronike në të cilën, mes tjerash, ka miratuar edhe Projektligjin për ndryshimin dhe plotësimin e Ligjit mbi ndarjet buxhetore për buxhetin e Republikës së Kosovës për vitin 2026.

Qeveria ka miratuar në parim edhe nismën për lidhjen e marrëveshjes së kredisë ndërmjet Kosovës, e përfaqësuar nga Ministria e Financave dhe Agjencia Franceze për Zhvillim, për Lojërat Mesdhetare 2030, si dhe Projektligjin për ndryshimin dhe plotësimin e Ligjit për parandalimin e pastrimit të parave dhe luftimin e financimit të terrorizmit.

Qeveria gjithashtu ka miratuar edhe vendimin për t’ia propozuar Kuvendit kandidatët për shtatë pozita për drejtorë të Bordit të Agjencisë Kosovare të Privatizimit. Buxheti për vitin 2026 u pati miratuar në Kuvend më 20 shkurt. Për buxhetin patën votuar deputetët e pushtetit, ndërkohë që ata të opozitës kanë votuar kundër. Buxheti për vitin 2026 është paraparë të jetë 4 miliardë euro, prej të cilave 3.64 miliardë janë të hyra, ndërsa pjesa tjetër do të mbulohet me kredi dhe me deficit.

Ministri i Financave, Hekuran Murati, pati thënë se buxheti për vitin e ardhshëm është i përkohshëm dhe emergjent, dhe se ai do të rishikohet dhe do të ndryshohet me prioritetet e Qeverisë të reflektuara në të.

Ndërkohë që përfaqësuesit e opozitës patën votuar kundër, pasi që amendamentet e tyre nuk u patën përfshirë në buxhet.