Qeveria ka miratuar një numër projektligjesh të premten, në mesin e të cilëve edhe atë për masat e përkohshme të produkteve themelore në raste të veçanta të destabilizimit në treg.
Kabineti miratoi po ashtu projektligjin për shtetësinë e Kosovës, për lëndët plasëse, sigurimin e detyrueshëm të kujdesit shëndetësor, për provimin e maturës shtetërore, projektligjin për ndryshim-plotësimin e Ligjit për Kontabilitet, Raportim Financiar dhe Auditim, projektligjin për shërbimet e pagesave, si dhe atë për lojërat mesdhetare XXI Prishtina 2030.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoQeveria po ashtu e ka votuar për edhe Nismën për lidhjen e marrëveshjes së bashkëpunimit financiar dhe ushtarak mes Kosovës dhe Turqisë.
Vitia: Me sigurimin e detyrueshëm shëndetësor zvogëlohet pabarazia në ofrimin e shërbimeve
Photo: Driton Paçarada
Sipas Vitisë, për hartimin e këtij projektligji janë analizuar dhe studiuar praktikat më të mira ndërkombëtare, duke u marrë parasysh edhe rrethanat ekonomike dhe sociale në Kosovë. Ai theksoi se pas një dekade, ky ligj më në fund po merr formën e duhur për të vazhduar rrugëtimin në Parlament.
Ministri shtoi se ligji përfshin të gjithë popullatën dhe synimi kryesor është qasja universale në shërbime shëndetësore. Sipas tij, me këtë ligj do të përshpejtohet arritja e mbulimit shëndetësor universal, do të përmirësohet mirëqenia dhe shëndeti i qytetarëve, si dhe do të zvogëlohet varfëria dhe pabarazia në ofrimin e shërbimeve shëndetësore.
“Ligji përfshinë të gjithë popullatën. Synimi është për qasje universale. Me këtë ligj do të përshpejtohet arritja e mbulimit shëndetësor universal, që të përmirësohet mirëqenia dhe shëndeti, duke zvogëluar varfërinë dhe pabarazinë në ofrimin e shërbimeve shëndetësore”, ka thënë Vitia.
Çmimet tavan, Kusari-Lila: Do të caktohet marzha e fitimit mbi të cilat nuk guxon të tregtohet
Ministrja e Ndërmarrësisë, Industrisë dhe Tregtisë, Mimoza Kusari-Lila, ka dhënë detaje se si do të zbatohet në praktikë Projektligji për masat e përkohshme të produkteve themelore në rastet e veçanta të destabilizimit në treg.
Pas miratimit në qeveri, ajo tha se bordi i themeluar nga Kuvendi do të përcaktojë saktë një listë të produkteve për mbikëqyrjen e çmimeve, mbi të cilat nuk guxon të tregtohet.
“Në këtë rast mund të përcaktojmë saktë se për një listë të produkteve të miratuara nga bordi për mbikëqyrjen e çmimeve do të ketë çmime mbi të cilat nuk guxon të tregtohet. Në situata të tilla do të ketë një mbikëqyrje dhe sanksionim më të rreptë. Kjo do të përcillet me fushatë informuese edhe për konsumatorët dhe operatorët. Ideja nuk është të krijojmë panikë ose humbje të produkteve në treg, por të ruhet interesi i qytetarëve. Në secilën krizë ka të tillë që synojnë përfitimin”.
Ajo tha se edhe caktimi i marzhës së fitimit për derivatet po jep rezultate konkrete.
“Vendimi për përcaktimin e marzhës së fitimit në derivate ka funksionuar. Ne kemi përcjellë tregun dhe ka pasur keqkuptim mbi atë se cili është çmimi. Ne nuk kemi vendosur çmim tavan, por kemi vendosur marzhë të fitimit. Ajo është e lidhur me çmimin e importit. Rrjedhimisht, nëse në një ditë çmimi në doganë pas akcizës dhe TVSH-së ka qenë 1 euro e 60 cent, marzha ka mundur të shkojë deri në 1 euro e 74 cent. Shumica e operatorëve kanë përdorur pjesën prej 2 deri në 8 cent, nuk e kanë përdorur çmimin maksimal. Ka pasur katër raste të shkeljes së këtij vendimi dhe janë në procedurë”, tha ajo.
Kurti: Me projektligjin për çmimet tavan evitohen keqpërdorimet në emër të krizave
Photo: Driton Paçarada
Qeveria e Kosovës në një mbledhje të premten e ka risjellë projektligjin për çmimet tavan.
Kryeministri Albin Kurti ka thënë se ky ligj eviton keqpërdorimet në emër të krizave dhe mbron lirinë e tregut nga abuzimi.
“Kemi nisur edhe iniciativë për krijimin e ligjit që njihet si ligji për çmimet tavat, kjo jo për ta penguar zhvillimin e askujt, por për të evituar keqpërdorimet në emër të krizave të vazhdueshme dhe rritjen artificiale të çmimeve. Ngjashëm si iniciativa edhe ky ligj u pat sfiduar në Gjykatën Kushtetuese nga ana e opozitës. Andaj po e risjellim për miratim këtë projektligj që vjen si përgjigje e domosdoshme ndaj një realiteti që qytetarët e kanë përjetuar, rritje e papritur e çmimeve, paqartësi në treg dhe mungesë e mekanizmave efektivë për mbrojtje e ruajtja. Me këtë ligj po e mbrojmë lirinë e tregut nga abuzimi”, ka thënë ai.
Kurti ka theksuar se ky projektligj krijon instrumente të qarta për ndërhyrje të përkohshme.
“Ky ligj garanton çmime të përballueshme për produktet bazë në kohë krize. Siguron reagim te shpjet institucional kur tregu destabilizohet”, theksoi Kurti.
Gjykata Kushtetuese e pati shpallur antikushtetues ligjin për çmimet tavan për produktet bazë, i cili ishte dërguar në gjykatë nga deputetë të opozitës.