Presidenti i rrëzuar i Venezuelës, Nicolas Maduro, do të paraqitet të hënën në gjykatën federale të Manhattanit në New York, për t'u përballur me akuzat për narko-terrorizëm, disa ditë pasi kapja e tij nga ushtria amerikane shkaktoi pasiguri të thellë rreth të ardhmes së kombit të pasur me naftë të Amerikës së Jugut.
Maduro, 63 vjeç, dhe gruaja e tij, Cilia Flores, janë burgosur në Brooklyn pasi forcat amerikane i kapën ata nga Karakasi në një bastisje të papritur fundjave, teksa ata tashmë janë transferuar në gjykatë, nën përcjelljen e një numri të madh të forcave amerikane DEA.
Të dy do të paraqiten në seancën dëgjimore të planifikuar për në orën 12:00 me kohë lokale të New Yorkut, para gjykatësit të distriktit amerikan Alvin K. Hellerstein. Nuk është e qartë nëse ndonjëri prej tyre ka siguruar avokatë, apo nëse do të pranojë fajësinë.
SHBA-ja e ka konsideruar Maduron një diktator të paligjshëm që kur ai shpalli fitoren në zgjedhjet e vitit 2018, të cilat u akuzuan gjerësisht për parregullsi masive. Kapja e tij shënon ndërhyrjen më të diskutueshme të Uashingtonit në Amerikën Latine që nga pushtimi i Panamasë 37 vjet më parë.
Prokurorët thonë se Maduro është boshti i një karteli zyrtarësh politikë dhe ushtarakë venezuelianë që kanë komplotuar për dekada me grupet e trafikut të drogës dhe organizatat e shpallura terroriste nga SHBA-ja për të përmbytur SHBA-në me mijëra tonë narkotikë.
Maduro u padit për herë të parë në vitin 2020 si pjesë e një çështjeje të gjatë për trafikim narkotikësh kundër zyrtarëve aktualë dhe ish-venezuelianë dhe guerilëve kolumbianë.
LIVE VIDEO: Transferimi i Maduros në gjykatë:
Maduro deklarohet i pafajshëm para gjykatës në SHBA, seanca tjetër më 17 mars
Foto: ABC News
(BBC, AP) - Presidenti i rrëzuar i Venezuelës, Nicolas Maduro, është deklaruar i pafajshëm në paraqitjen e tij të parë të hënën para gjykatës amerikane në New-York, bashkë me gruan e tij, ku është përballur me akuzat për narkoterrorizëm, të cilat administrata Trump i përdori për të arsyetuar kapjen dhe dërgimin e tij në SHBA.
Gjatë seancës dëgjimore ai ka thënë se është ende president i Venezuelës teksa nuk ka kërkuar lirim me kusht.
Seanca e radhës ndaj tij është caktuar për 17 mars.
Maduro po ashtu ka deklaruar gjatë seancës së është një “i burgosur lufte”
Transferimi i Maduros dhe gruas së tij nga burgu për në gjykatë kishte filluar me momente dramatike të hënën. Zhurma e prangave në këmbë të Maduros mund të dëgjohej para se ai të hynte në sallën e gjyqit, ku ai është kthyer, ka tundur kokën dhe duket sikur u ka thënë “buenos dias” disa personave në sallë.
Momenti më i tensionuar ishte në fund të seancës, kur një anëtar i publikut filloi t'i bërtiste në spanjisht Maduros se ai do të “paguajë” për atë që kishte bërë.
Mirëpo Maduro është kthyer nga ai dhe është përgjigjur në spanjisht se ai ishte një “president i rrëmbyer” dhe një “rob lufte” përpara se të shoqërohej jashtë i lidhur, pas gruas së tij, përmes derës së pasme të gjykatës.
Çifti u transportua nën masa të rrepta sigurie të hënën herët nga burgu i Bruklinit ku është duke u mbajtur, për në një gjykatë të Manhattanit.
Tensionet në KS të OKB-së
Ndërkohë, Këshilli i Sigurimit i OKB-së ka mbajtur të hënën një takim urgjent për Venezuelën, gjatë të cilit palët kanë paraqitur pikëpamje të kundërta për operacionin amerikan në shtetin e Amerikës së Jugut.
I dërguari i Rusisë në Kombet e Bashkuara, Vasily Nebenzya, u ka bërë thirrje të hënën Shteteve të Bashkuara të lirojnë presidentin e Venezuelës, Nicolas Maduro, duke paralajmëruar se veprimet e Uashingtonit mund të sjellin një epokë të re kolonializmi dhe imperializmi.
“Washingtoni po gjeneron një vrull të ri për neokolonializmin dhe imperializmin, të cilat u dënuan dhe u hodhën poshtë në mënyrë të përsëritur dhe vendimtare nga popujt e këtij rajoni dhe nga jugu global në tërësi... Kambana tani bie në të gjithë rajonin, duke rënë për çdo vend të Hemisferës Perëndimore”, ka deklaruar Nebenzya.
Ndërkaq, i dërguari i SHBA-së, Mike Waltz, ka përsëritur deklaratën e sekretarit amerikan të shtetit, Marco Rubio, duke thënë se kapja e Maduros, ishte një “operacion i zbatimit të ligjit”. Ai ka theksuar se SHBA-ja nuk e ka pushtuar Venezuelën.
“Nuk ka luftë kundër Venezuelës apo popullit të saj. Ne nuk po pushtojmë një vend”, është shprehur Waltz.
Mediat kanë raportuar se Maduro është paraqitur në gjykatë me uniformë burgu teksa ai ka angazhuar avokatin Barry Joel Pollack, tregojnë të dhënat e gjykatës federale.
Pollack njihet më së shumti për përfaqësimin e themeluesit të Ëikileaks, Julian Assange.
Zbutja e tonit
Ndërkohë, presidentja e përkohshme e Venezuelës, Delcy Rodriguez, e cila fillimisht ka kërkuar që SHBA-ja ta kthejë Maduron, të dielën vonë ka zbutur qëndrimin duke ofruar bashkëpunim me presidentin Trump dhe “marrëdhënie respekti” me SHBA-në.
E presidenti Trump i ka bërë thirrje asaj të sigurojë “qasje të plotë” në vendin e saj, përndryshe e ka kërcënuar se do të përballet me pasoja.
Një aktakuzë prej 25 faqesh e bërë publike të shtunën ngarkon Maduron dhe të tjerët se kanë bashkëpunuar me kartelet e drogës për të lehtësuar dërgesën e mijëra tonëve kokainë në SHBA.
Ata mund të përballen me burgim të përjetshëm nëse dënohen.
SHBA-ja ka kapur Maduron dhe gruan e tij gjatë një operacioni ushtarak të shtunën, në shtëpinë e tyre në një bazë ushtarake.
Trumpi ka thënë pas kapjes së tij se SHBA-ja do ta drejtojë Venezuelën përkohësisht.
Lajmi i mirë për Hungarinë
Kryeministri hungarez, Viktor Orban, ka thënë të hënën se operacioni ushtarak amerikan në Venezuelë që rrëzoi presidentin e vendit, Nicolas Maduro, është një "lajm i mirë" për Hungarinë, për shkak të efekteve të mundshme pozitive të këtij veprimi në tregjet botërore të energjisë.
Duke folur në një konferencë për shtyp në Budapest, Orban, një aleat i ngushtë i presidentit të SHBA-së Donald Trump, i cili urdhëroi sulmin ushtarak kundër Venezuelës, ka thënë se së bashku, Shtetet e Bashkuara dhe Venezuela mund të kontrollojnë 40% deri në 50% të rezervave globale të naftës.
"Amerikanët kanë nevojë për energji më të lirë për programin e politikave ekonomike të shpallur nga presidenti. Kjo kërkon çmime më të ulëta të energjisë se ato të sotmet. Dhe ky është një lajm i mirë për Hungarinë", ka thënë Orban.
"Unë shoh një shans serioz që, si rezultat i vënies nën kontroll të Venezuelës, një situatë më e favorshme globale e energjisë do të lindë edhe për Hungarinë. Dhe ky është një lajm i mirë”, ka shtuar ai.
Hungaria nën Orbanin ka mbetur shumë e varur nga nafta dhe gazi rus edhe pasi Moska nisi pushtimin e saj në shkallë të plotë të Ukrainës fqinje në shkurt 2022, duke ngatërruar shumicën e partnerëve të saj në Bashkimin Evropian, të cilët kanë ulur ndjeshëm importet e tyre të energjisë ruse ose i kanë ndaluar ato plotësisht.
Kërcënimi i Trumpit dhe paralajmërimi i Petros
Presidenti kolumbian, Gustavo Petro, ka paralajmëruar të hënën se do të “merrte armët në dorë” nëse SHBA-ja vendos ta sulmojë atë ose vendin e tij, pas një sërë kërcënimesh nga presidenti amerikan, Donald Trump.
Në një postim në X, Petro ka nënvizuar përpjekjet e tij për të luftuar trafikun e drogës, gjë për të cilën Trumpi e ka kritikuar, teksa ka pretenduar se sulmet ushtarake amerikane kundër trafikantëve në Kolumbi do të rrezikonin vrasjen e fëmijëve dhe nxitjen e rekrutimit për grupet separatiste që kanë qenë në konflikt me shtetin për dekada.
“Dhe nëse arrestojnë një president që ka mbështetjen dhe respektin e një pjese të madhe të vendit, ata do të nisin një kryengritje popullore”, ka shtuar ai.
Petro, një ish-anëtar i grupit guerilas M19, ka thënë gjithashtu se ai vetë do të luftonte për të mbrojtur Kolumbinë.
“U betova se nuk do të prekja më një armë por për atdheun do të marr përsëri armët”, ka thënë ai.
Trumpi ka pasur fjalë të ashpra për Petron të dielën, duke e përshkruar atë si “një njeri të sëmurë që i pëlqen të bëjë kokainë dhe ta shesë atë në Shtetet e Bashkuara, dhe se nuk do ta bëjë këtë për shumë kohë”.
Kur një gazetar e pyeti nëse këto komente nënkuptonin se mund të kishte një “operacion” në Kolumbi në të ardhmen, Trump është përgjigjur: “Më duket mirë”.
Maduro del para gjykatës në SHBA
Foto: ABC News
Presidenti i rrëzuar venezuelian, Nicolas Maduro dhe gruaja e tij Cilia Flores, janë paraqitur në gjykatë në orën 18:00 sipas kohës së Kosovës, ku do të lexohen akuzat e tyre.
Aktakuza prej 25 faqesh përfshin akuza të ndryshme për drogë dhe armë, përfshirë "konspiracion narko-terrorizëm”.
Alvin Hellerstein, një gjyqtar rrethi 92-vjeçar, po mbikëqyr çështjen.
Maduro dhe gruaja e tij pritet të rikthehen në paraburgim, pasi nuk pritet të miratohet ndonjë kërkesë për lirim me kusht.
Protestues pro dhe kundër Maduros mblidhen para gjykatës së New Yorkut
Photo: Associated Press
Dhjetëra protestues janë mbledhur jashtë gjykatës në New York ndërsa afron seanca dëgjimore për Maduron dhe gruan e tij.
Ata po brohorasin në spanjisht, teksa numri i protestuesve pro-Maduros duket se është më i madh se ai kundër-Maduros.
Hapësira është mbushur plot me njerëz ndërsa turma shtypi janë mbledhur rreth njerëzve që brohorasin.
Shumë prej të mbledhurve mbajnë flamuj dhe pankarta të Venezuelës.
Presidenti i rrëzuar i Venezuelës, Nicolas Maduro dhe gruaja e tij, janë kapur të shtunën nga forcat amerikane dhe janë transferuar për në New York.
Ata do të përballen me akuza për narko-terrorizëm.
Qeveria zvicerane ngrin pasuritë e Maduros
Photo: Associated Press
Qeveria zvicerane ka ngrirë pasuritë e mbajtura nga presidenti i rrëzuar i Venezuelës, Nicolas Maduro, dhe "persona të tjerë të lidhur me të me efekt të menjëhershëm".
Ajo ka thënë se kjo po bëhet për të parandaluar nxjerrjen e çdo pasurie të tillë nga vendi dhe se nëse procedurat e ardhshme ligjore tregojnë se ato janë fituar në mënyrë të paligjshme, Zvicra do të përpiqet t'ia kthejë ato popullit venezuelian.
Zvicra ka vendosur sanksione ndaj Venezuelës që nga viti 2018, të cilat përfshijnë ngrirje pasurish dhe ndalime udhëtimi për 54 individë.
Nuk është e qartë se çfarë pasurish mban Maduro në Zvicër, por një raport i vitit 2021 në një gazetë zvicerane bazuar në dokumente të rrjedhura thoshte se prokurorët zviceranë kishin identifikuar llogari bankare që përmbanin afërsisht 10 miliardë dollarë që mund të kenë ardhur nga fonde publike të përvetësuara në Venezuelë.
Ngrirja e pasurive të hënën hyn në fuqi me efekt të menjëhershëm dhe do të mbetet e vlefshme për katër vjet deri në njoftim të mëtejshëm.
Kush është gjyqtari 92-vjeçar të cilit i është besuar çështja e Maduros
Çështja e madhe kundër presidentit të rrëzuar venezuelias, Nicolas Maduro, i është caktuar gjyqtarit federal 92-vjeçar Alvin K. Hellerstein, i cili ishte nominuar dhe konfirmuar nga presidenti Bill Clinton në vitin 1998.
Hellerstein, një gjyqtar i lartë që nga viti 2011 në Distriktin Jugor të Nju Jorkut, ka kryesuar çështje që rrjedhin nga sulmet terroriste të 11 shtatorit 2001, si dhe çështje të tjera që përfshijnë terrorizmin dhe sigurinë kombëtare.
Gjatë verës, ish-gjenerali dhe kreu i inteligjencës venezueliane, Hugo Carvajal Barrios, u deklarua fajtor para Hellerstein për akuzat që lidhen me narkoterrorizmin dhe trafikimin e drogës.
Hellerstein ka përbërë gjithashtu lajm vitet e fundit kur ai mohoi kërkesën e Trumpit për të transferuar çështjen e tij penale për heshtje në gjykatën federale.
Hellerstein kishte gjetur se rimbursimi i Trumpit për Michael Cohen, i cili lehtësoi pagesat e parave për heshtje për aktoren e filmave për të rritur Stormy Daniels, nuk ishin akte zyrtare të lidhura me presidencën e tij.
Trumpi ende po e lufton këtë vendim.
Në pranverë, Hellerstein nxori një vendim që e ndalonte administratën Trump të përdorte Aktin e Armiqve të Huaj për të deportuar venezuelianët dhe e kritikoi administratën për deportimin e njerëzve në një burg të huaj "me shpresë të zbehtë për proces gjyqësor ose kthim".