Princi Andrew do të largohet nga shtëpia e tij në Royal Lodge në Windsor pasi iu dorëzua një njoftim zyrtar për të hequr dorë nga kontrata e qirasë, tha Pallati Buckingham.
“Mbreti Charles ka nisur një proces formal për të hequr stilin, titujt dhe nderimet e Princit Andrew”, i cili tani do të njihet si Andrew Mountbatten Windsor”, ka njoftuar pallati.
Andrew nuk e ka kundërshtuar procesin, raportoi PA.
Lidhjet e Andrewit me abuzuesin seksual të fëmijëve dhe financuesin Jeffrey Epstein vazhdojnë të shkaktojnë polemika. Kuptohet që, megjithëse ai i mohon akuzat, Pallati i Buckingham konsideron se ka pasur gabime nga ana e tij.
“Tani është dërguar një njoftim zyrtar për të hequr dorë nga kontrata e qirasë dhe ai do të zhvendoset në një banesë private alternative. Këto qortime konsiderohen të nevojshme, pavarësisht faktit se ai vazhdon të mohojë akuzat kundër tij. Madhëritë e tyre dëshirojnë ta bëjnë të qartë se mendimet e tyre më të thella kanë qenë dhe do të mbeten me viktimat dhe të mbijetuarit e çdo forme abuzimi”, është thënë tutje në njoftim.
Princi Andrew do të zhvendoset në një pronë në pasurinë private Sandringham në Norfolk, që do të financohet privatisht nga mbreti.
Edhe
Qeveria britanike shqyrton heqjen e ish-princit Andrew nga linja mbretërore e trashëgimisë
Ish-gruaja e tij, Sarah Ferguson, do të largohet gjithashtu nga Royal Lodge dhe do të rregullojë vetë jetën e saj.
Zhvendosja do të bëhet sa më shpejt të jetë e mundur.
Mbreti ka pasur mbështetjen e Princit të Uellsit në vendimin e tij.
