SHBA-ja do t'u refuzojë vizat aplikantëve që thonë se kanë frikë nga persekutimi në vendin e tyre

Aplikantët për viza në Shtetet e Bashkuara tani e tutje nuk duhet të pohojnë se kanë frikë nga persekutimi në vendet e tyre të origjinës, ndërsa administrata Trump kërkon të kufizojë më tej hyrjen në vend të azilkërkuesve potencialë.

Rregulli i ri, i përshkruar në një kabllogram diplomatik drejtuar të gjitha ambasadave dhe konsullatave këtë javë, vjen mes një ndryshimi të madh në politikat që kanë përmbysur dhe kufizuar imigracionin në SHBA.

Administrata tashmë ka shtuar verifikimin për aplikantët për viza studentore dhe ka ndaluar përkohësisht vendimet për aplikimet për imigracionin, për të siguruar që ata përmbushin udhëzimet e reja të kontrollit të sigurisë, sipas një burimi të njohur me situatën dhe një memoje të brendshme.

Rregulli zbatohet për ata që aplikojnë për viza jo-imigruese, të cilat përfshijnë ato për turistët, studentët dhe punëtorët e përkohshëm. 

Në janar, SHBA-ja ka pezulluar përpunimin e vizave për imigracion për 75 vende.

"Zyrtarët konsullorë duhet të parandalojnë abuzimin e sistemit të imigracionit nga aplikantët për viza që keqinterpretojnë qëllimin e udhëtimit të tyre, duke përfshirë ata që përpiqen të marrin viza jo-imigruese me qëllim të kërkimit të azilit pas mbërritjes në Shtetet e Bashkuara", thuhej në kabllogram, i cili është parë nga CNN-i.

Direktiva nga Departamenti i Shtetit udhëzon zyrtarët konsullorë që t'u bëjnë aplikantëve për vizë jo-imigruese dy pyetje: "A keni përjetuar dëm ose keqtrajtim në vendin tuaj të kombësisë ose në vendbanimin tuaj të fundit të zakonshëm?" dhe "A keni frikë nga dëmi ose keqtrajtimi gjatë kthimit në vendin tuaj të kombësisë ose të vendbanimit të përhershëm?"

"Aplikantët për vizë duhet t'u përgjigjen verbalisht me një 'jo' të dyja pyetjeve që zyrtari konsullor të vazhdojë me lëshimin e vizave", udhëzohej në kabllogram.

Një zëdhënëse e Departamentit të Shtetit ka thënë se “zyrtarët konsullorë janë vija e parë e mbrojtjes për sigurinë kombëtare të SHBA-së” teksa ka vënë në dukje se departamenti “përdor të gjitha mjetet dhe burimet e disponueshme për të përcaktuar nëse çdo aplikant për vizë kualifikohet sipas ligjit të SHBA-së”.

Për të kërkuar azil, një person duhet të jetë fizikisht i pranishëm në SHBA dhe të largohet nga persekutimi politik, racor ose fetar në vendin e tij të origjinës.

Camille Mackler, një konsulente për politikat e imigracionit, i ka thënë CNN-it se direktiva e re “do t’i vendosë njerëzit në pozicione vërtet të këqija, të tmerrshme, duke u detyruar të bëjnë zgjedhje që në fund të fundit ndikojnë në sigurinë e tyre dhe të familjes së tyre”.