Ukraina godet rajonin ku pritet të mbahet “Davosi rus"

Rusia ka rrëzuar 50 dronë mbi rajonin e Leningradit në veriperëndim të Moskës gjatë natës të së martës, dhe vazhdon të sprapsë sulmet e dyshuara ukrainase, ka thënë të mërkurën guvernatori, Alexander Drozdenko, ndërsa një forum i madh ekonomik vjetor pritet të fillojë atje.  

Rajoni i Leningradit, shtëpia e infrastrukturës thelbësore të eksportit të energjisë dhe një rafinerie të madhe nafte, do të presë konferencën ekonomike, të njohur si "Davosi rus" të presidentit Vladimir Putin, nga e mërkura.

Forumi i investimeve, i pesti që kur Rusia dërgoi trupa në Ukrainë në vitin 2022, hapet vetëm disa orë pas një sulmi vdekjeprurës rus me dronë dhe raketa në Kiev, për të cilin Moska ka thënë se ishte në përgjigje të një sulmi vdekjeprurës në një konvikt në Luhansk të kontrolluar nga Kremlini.

Putin do të mbajë fjalimin e tij kryesor të premten në një seancë ku do të marrin pjesë edhe presidentët e Uzbekistanit dhe Tanzanisë, si dhe zv/presidenti i Kinës dhe ministri i Energjisë i Arabisë Saudite, tregon agjenda. 

Një ndikues i shquar i krahut të djathtë në SHBA, një zyrtar në detyrë në SHBA dhe një miliarder gjerman i shitjes me pakicë pritet gjithashtu të marrin pjesë në forum.

Në Shën Petersburg, qytetin e dytë më të madh të Rusisë dhe qytetin e lindjes së Putinit, aeroporti i Pulkovos ka kufizuar përkohësisht fluturimet, ka njoftuar mbikëqyrësi i aviacionit rus "Rosaviatsia" në aplikacionin e mesazheve Telegram. Më shumë se 30 fluturime janë vonuar ose anuluar, kanë raportuar mediat lokale.

Shën Petersburgu ka vënë në vend masa gjithëpërfshirëse sigurie përpara ngjarjes, ka thënë Alexander Beglov, guvernatori i qytetit, për agjencinë e lajmeve RIA.

"Të gjitha sfidat e reja janë marrë plotësisht në konsideratë. Forcat e zbatimit të ligjit kanë ndarë personel dhe pajisje për të ofruar sigurinë dhe rendin publik", ka thënë ai.

Ukraina kohët e fundit ka shtuar sulmet ndaj infrastrukturës energjetike ruse, ndërsa përpiqet ta privojë Moskën nga të ardhurat. Të martën, ajo ka me dronë goditur rafinerinë e naftës së eksportit Ilsky në jug të Rusisë.

Të paktën 20 dronë që shkonin drejt Moskës u rrëzuan gjatë natës, ka thënë kryebashkiaku Sergei Sobyanin në Telegram.