Nevil Dede do të jetë trajner i ri i skuadrës së Ferizajt.
Ai është prezantuar të premten nga klubi ferizajas, ndërsa në postin e trajnerit e zëvendëson Arsim Abazin.
Abazi dha dorëheqje pas disfatës së thellë 5:0 nga Prishtina të dielën. Ferizaj e pësoi disfatën e pestë nga shtatë ndeshje sa i ka luajtur, dhe zë vendin e fundit me gjashtë pikë. Gjashtë pikë i kanë edhe Prishtina e Re dhe Llapi.
“Me përvojë të gjatë si lojtar dhe trajner në futbollin shqiptar, Dede sjell profesionalizëm dhe përkushtim të madh, me synim ngritjen e nivelit të skuadrës dhe arritjen e rezultateve pozitive”, ka shkruar Ferizaj ndër të tjera.
Dede në Shqipëri ka udhëhequr Tiranën, Laçin, Luftëtarin, Kastriotin, Erzenin, Dinamon e Tiranës, Elbasanin dhe Bylisin. Ka qenë edhe përzgjedhës i futbollisteve dhe futbollistëve të grupmoshës U19 të Shqipërisë.