Vedat Muriqi vazhdon të jetë njëri prej tre golashënuesve më të mirë të La Ligas.
Pas xhiros së zhvilluar në fundjavë, Kylian Mbappe është i pari në ranglistë me 17 gola. Mbappe po shkëlqen te Real Madridi, ndërsa ka edhe katër asistime.
Ferran Torres i Barcelonës është golashënuesi i dytë, me 11 gola. Ka edhe një asistim.
Ndërkohë Muriqi është i treti në ranglistë me nëntë gola. Kosovari po shkëlqen te Mallorca këtë edicion. Tashmë e ka kaluar shifrën e golave që i shënoi gjatë gjithë edicionit, në dy kampionatet e kaluara.
Robert Lewandowski i Barcelonës, Julian Alvarez i Atletico Madridit dhe plot emra të tjerë të mëdhenj janë prapa Muriqit. Ndër të tjera edhe Lamine Yamal e Raphinha.
31-vjeçari të shtunën shënoi supergol në fitoren 3:1 të Mallorcas ndaj Elches. Ndeshja i takoi xhiros së 16-të të kampionatit spanjoll. Ai realizoi me goditje mjeshtërore me kokë nga rreth 15 metra largësi.
Me formën aktuale ky do të jetë edicioni më i mirë në karrierë për prizrenasin. Edicioni më i mirë i tij deri më tani ishte 2022/2023, kur për Mallorcan i realizoi 15 gola e tri asistime në 35 paraqitje në La Liga.
