Fëmijët e Rob dhe Michelle Reiner flasin për herë të parë pas vdekjes së prindërve

Jake dhe Romy Reiner, fëmijët e yjeve të Hollywoodit, Rob dhe Michele Reiner, kanë reaguar për herë të parë publikisht pas vrasjes tronditëse të prindërve të tyre, të cilët u gjetën të pajetë në shtëpinë e tyre në Brentwood të Kalifornisë. Vëllai i tyre, Nick Reiner, 32 vjeç, është arrestuar dhe akuzohet për vrasje të shkallës së parë.

“Fjalët nuk mjaftojnë për të përshkruar dhimbjen e paimagjinueshme që po përjetojmë në çdo moment të ditës. Humbja e tmerrshme dhe shkatërruese e prindërve tanë, Rob dhe Michele Reiner, është diçka që askush nuk duhet ta përjetojë. Ata nuk ishin vetëm prindërit tanë; ishin miqtë tanë më të mirë”, kanë thënë Jake e Romy në një deklaratë për revistën People.

Ata kanë falënderuar gjithashtu të gjithë ata që u kanë qëndruar pranë në këtë periudhë të vështirë.

“Jemi mirënjohës për ngushëllimet, mirësinë dhe mbështetjen e madhe që kemi marrë, jo vetëm nga familja dhe miqtë, por edhe nga njerëz të panumërt nga të gjitha shtresat e shoqërisë”, thuhet në deklaratë.

Në fund, ata kërkuan respekt dhe ndjeshmëri nga publiku dhe mediat.

“Tani kërkojmë respekt dhe privatësi. U bëjmë thirrje njerëzve që spekulimet të zbuten me dhembshuri dhe humanizëm dhe që prindërit tanë të kujtohen për jetën e jashtëzakonshme që jetuan dhe dashurinë që dhanë”, deklaruan ata.

Nick Reiner u paraqit për herë të parë në gjykatë të mërkurën, një ditë pasi u akuzua zyrtarisht për vrasjen e prindërve të tij. Ai nuk dha deklarim fajësie dhe pranoi që seanca e radhës, ajo e aktakuzës, të shtyhet për më 7 janar.

Rob dhe Michele Reiner u gjetën të vdekur në shtëpinë e tyre të dielën pasdite, ndërsa Nick u arrestua po atë mbrëmje.

Sipas The New York Times, Romy ishte ajo që zbuloi trupin e të atit, pasi një terapist masazhi nuk kishte arritur t'i kontaktonte prindërit e saj. Nëse shpallet fajtor, Nick Reiner mund të përballet me dënim me vdekje ose burgim të përjetshëm pa mundësi lirimi me kusht.