Dita e 14-të e fushatës

Abdixhiku thotë se Fushë-Kosova është histori suksesi e qeverisjes 25-vjeçare të LDK-së

Sheshi “Nënë Tereza” në Fushë Kosovë është prioriteti kryesor i kandidatit për kryetar, Besnik Osmani, i cili premtoi gjithashtu ndërtimin e një shtëpie për të moshuarit, përfundimin e stadiumit ekzistues dhe ngritjen e tre stadiumeve të reja.

Osmani i bëri këto zotime gjatë tubimit elektoral të LDK-së, të premten.

“Për të moshuarit kemi premtuar shtëpinë e pleqve, një institucion modern që do të kujdesemi për mirëqenien e tyre. Për rinin kemi premtuar qendrën inovative, një hapësire e dedikuar për inovacion, ndërmarrësi e teknologji. Një vend ku rinia jonë do ta shfrytëzojë gratis të gjitha shërbimet që ofrohen nga Komuna. Për sportistët ashtu siç kemi premtuar, kemi filluar ndërtimin e stadiumit që po investojmë me paranë e Komunës e do të bëjmë tri stadiume të tjera”, ka thënë Osmani.

Ai në tubim theksoi se është zotuar vetëm për atë që mund ta mbajë financiarisht. Sipas tij, në Fushë Kosovë do të investohen 55 milionë euro në projekte kapitale.

“Kemi premtuar saktë duke shkruar se cili është burimi financiar. Kemi premtuar duke shkruar saktë se ku është vendi ku do të ndërtohet. Kemi premtuar duke e shkruar saktë se kur është koha që do të zbatohet. Prandaj e keni të lehtë për të na mbajte në llogaridhënie”, u shpreh Osmani

Ai u zotua po ashtu edhe për disa projekte të tjera.

“Ashtu siç kemi premtuar, ashtu siç jemi zotuar do t’i mbajmë. Po në të dy krahët e Fushë Kosovës do të kemi dy rrugë të reja për t’u lidhur me kryeqytet. Ashtu siç jemi zotuar, do të kemi tri parkingje nëntokësore në kryeqytet. Ashtu siç kemi pretuar do të bëjmë tri shkolla në qytet, do të bëjmë tri çerdhe të reja në qytet dhe do të bëjmë katër çerdhe në katër fshatra.”

Në këtë tubim elektoral, kryetari i LDK-së, Lumir Abdixhiku, derisa prezantoi kandidatin e kësaj partie për kryetar të komunës, Besnik Osmanin, ka thënë se Fushë Kosova është rrëfimi i LDK-së. Ai ka thënë se Fushë Kosova është transformuar si rezultat i udhëheqjes së gjatë të Burim Berishës dhe sipas tij transformimi pritet të vazhdojë me Besnik Osmanin

“Sonte qëndrojmë në një qytet që është histori suksesi, në një qytet që është shembull për gjithë Kosovën. Një qytet që na qëndron si model i zhvillimit, prosperitet dhe përparimit. Fushë Kosova është sot një tregim i madh për atë që Lidhja Demokratike e Kosovës di të bëjë kur ka besimin e qytetarëve të vet. Nga një periferi e vogël e kryeqytetit, e shpërfillur dhe e harruar dikur, sot Fushë Kosova është shndërruar në qytetin më dinamik, më energjik dhe më të rritur të vendit. Ky është rrëfimi juaj. Ky është rrëfimi i LDK-së. Ky është rrëfimi i 25 viteve punë, vizion e përkushtim”, ka thënë Abdixhiku.

Kryetari i LDK-së u bëri thirrje që qytetarët të vazhdojnë besimin te kjo parti për të çuar përpara, sipas tij,  punën e nisur në komunë.

“Për 25 vite, Burim Berisha nuk ishte thjeshtë kryetar. Ai ishte arkitekti i Fushë Kosovës moderne. Ai ishte njeriu që e nxori qytetin nga hija e kryeqytetit dhe ia dha identitetin e vet. Ai ishte ai që ndërtoi rrugë, shkolla, lagje të reja. Ai ishte ai që solli investime, që krijoi kushte për banim, për zhvillim, për tregti, për jetë. Ai ishte ai që i dha kuptim fjalës “qytet” këtu ku jemi sot”, u shpreh Abdixhiku.

Në Gjilan, kandidati për kryetar Arbër Ismajli ka vizituar disa nga bizneset e qytetit.

Ka përgëzuar pronarët e tyre për mundësinë e hapjes së dyerve për punësimin e të rinjëve dhe të rejave.

“Për mua, këto janë momentet kur e sheh qartë se sa shumë mund të fitojë Gjilani kur bashkohen vizioni, guximi dhe puna e ndershme. Do të punojmë që të ketë mbështetje e lehtësira për sektorin privat, sepse aty është çelësi i zhvillimit dhe mirëqenies për qytetin tonë”, ka shkruar mes tjerash Ismajli.

Ai ka premtuar mbështetjen e tyre nëpërmjet projektit “Gjilani i ri”.

Latifi premton dronë për spërkatje, Berisha program që ua bën me të lehtë jetën qytetarëve

Kandidati i Aleancës për Ardhmërinë e Kosovës për kryetar të Prishtinës, Bekë Berisha, ka prezantuar të premten programin me shtatë prioritete, që, sipas tij, prekin drejtpërdrejt jetën dhe mirëqenien e çdo qytetari. Berisha ka thënë se programi i tij është realizuar në bashkëpunimin me ekspertë të fushave të caktuara. 

“Kam qenë në çdo lagje të Prishtinës, problemet e tyre dhe kërkesat… Shtatë prioritete të qarta, me zgjedhje konkrete, arsim modern me fëmijë të lirë, por të sigurt, shëndetësi që respekton dinjitetin, rrugë dhe transport që funksionojnë me infrastrukturë moderne dhe autobusë të rinj për nxënësit, ekonomi që hap vende pune, siguri dhe administratë efikase, kulturë dhe sport për rininë me hapësira të reja dhe mbështetje për talentet tona”, tha Berisha.

Në Rahovec, kandidati që synon edhe një mandat tjetër, Smajl Latifi, ka premtuar ndërtimin e rrugëve të reja dhe mirëmbajtjen e atyre ekzistuese. Ai ka theksuar zgjerimin e partneritetit të komunës me Qendrën grumbulluese të fruta-perimeve "Agrocelina" dhe fermerët lokalë, ndërsa ka paralajmëruar një projekt inovativ që përfshin përdorimin e dronëve për spërkatjen e kulturave bujqësore.

 “Në komunën e Rahovecit do të ketë 150 km rrugë fushore të reja dhe mirëmbajtje të rrugëve ekzistuese. Ju kam premtuar një projekt që mund të ndodhë e do të ndodhë në komunën tonë, do ta blejmë një shërbim të specializuar të spërkatjes të kulturave bujqësore, vreshtare dhe perimtare përmes dronëve”.

Në Pejë, kandidati Ali Berisha ka thënë se qyteti ka mbetur prapa në shumë fusha dhe se duhet të kthehet në funksion të qytetarëve. Ai është zotuar se nëse rikthehet në krye të komunës do ta bëjë rregullimin e projektit rrugor në drejtim të Stacionit të trenit. 

“Një herë e përgjithmonë do të rregullohet një projekt që është deformuar: projekti që fillon nga ‘Gorenje’ dhe shkon deri te stacioni i trenit e më tutje, do të bëhet me katër korsi. Ashtu ka qenë i planifikuar, ashtu ka qenë i tenderuar - por është ndryshuar, është deformuar, për shkak të ndërrimeve që janë bërë me projektin 'Kristal'. Në atë kohë, me projektin 'Kristal', është bërë zgjerimi i ujësjellësit, është bërë shtrirja e kanalizimeve, dhe është ndërtuar ambulanca (në vitin 2007). Në vitin 2007, buxheti për investime kapitale ka qenë 900 mijë euro. Në vitin 2013 ka qenë afër 4 milionë euro. Ndërsa sot flasim për rreth 50 milionë euro investime kapitale për një periudhë katërvjeçare – dhe me ato para mund të bëhen shumë punë, nëse menaxhohen ashtu siç duhet. Por, nëse vazhdohet kështu si po shkohet sot – ku më shumë para shkojnë te përmbaruesit sesa në investime – atëherë buxheti nuk u shërben qytetarëve, por mbulon shkeljet ligjore që po i bën komuna” , tha Berisha.

E në tubimin e mbajtur në Kaçanik, të premten kryetari i Aleancës për Ardhmërinë e Kosovës, Ramush Haradinaj, tha se qyteti që ka shkruar histori po u jep forcë për hapat e mëdhenj që e presin këtë subjekt politik. Ai prezantoi kandidaten për kryetare të komunës, Hafize Sallahu, duke theksuar se programi i saj sjell një vizion të qartë për transformimin që Kaçaniku ka nevojë.

“Ne kemi dëshmuar se projektet madhore realizohen - autostrada “Arben Xhaferi” është shembulli më i qartë i vizionit tonë qeverisës. Mungesa e ujit të pijshëm, menaxhimi i ujërave të zeza, mungesa e çerdheve, hapja e rrugëve alternative dhe digjitalizimi i shkollave janë prioritetet e menjëhershme që do të marrin zgjidhje”, tha Haradinaj.

Në Kamenicë, kandidati i AAK-së, Faton Jakupi, ka kundërshtuar pretendimet e kryetarit aktual për investime të realizuara. Ai ka thënë se shuma prej 40 milionë eurove është vetëm e planifikuar dhe jo e zbatuar, duke theksuar se shumë projekte që përmenden janë futur në buxhet vite më parë.

“Është e planifikuar 40 milionë euro o Kadri, jo e realizuar. Mos fol për rrugë, mos fol për rrugët e Malësisë. Kjo është kur ka hyrë në buxhet, 24 dhjetor 2018. Projektet dhe kopjet fizike i keni marrë nga zyra ime. Është projekt i vitit 2018”, ka deklaruar Jakupi.

Në Suharekë, kryetari aktual i komunës, Bali Muharremaj, ka thënë se komuna po zgjerohet çdo ditë dhe se ka nevojë për lagje të reja, shkolla, çerdhe dhe një zonë industriale. Në synimin për të fituar edhe një mandat, ai ka premtuar dhjetë projekte të reja në vlerë rreth 28 milionë euro. Muharremaj ka përmendur edhe disa nga projektet e nisura, por të papërfunduara, përfshirë stadiumin, objektin e “EkoTherandës” dhe shkollën “7 Marsi”.

Tahiri me shtatë perspektiva të Mitrovicës, Ismajli me zgjidhjen për trafikun e Prishtinës

Ka prezantuar programin e tij për Mitrovicën, nënkryetari e kandidati për kryetar, Arian Tahiri. Ai ka thënë se ky program mbështetet në shtatë shtylla - Mitrovica në Lëvizje, Mitrovica që Edukon, Mitrovica e Shëndetit dhe Pastërtisë, Mitrovica e Zhvilluar, Mitrovica Digjitale, Mitrovica që Kujdeset dhe Mbron, dhe e fundit, Mitrovica e Kulturës dhe e Sportit.

Në kuadër të shtyllës së parë që përfshin problemet e infrastrukturës rrugore e trafikut, Tahiri ka dhënë një varg premtimesh, përfshirë krijimin e zonave të reja për parking, nënkalim në magjistralen e Adriatikut e ndriçim publik në të gjitha lagjet e fshatrat e Mitrovicës.

“Asfaltimin e të gjitha rrugëve urbane dhe rurale, përfshirë Shalën e Bajgorës, ndërtimin e unazës së brendshme në qendër të qytetit, për ta lehtësuar komunikacionin, ndërtimin e parkingjeve publike në tri lokacione në qendër, për 2500 për vetura”.  

Në kuadër të pikës së dytë, Tahiri ka premtuar ndërtimin e pesë çerdheve të reja, renovim të shkollave, angazhimin e asistentëve dhe psikologëve.

Në kuadër të pikës Mitrovica e Shëndetit dhe Pastërtisë, Tahiri premtoi rritje të stafit shëndetësor, pajisje të reja, furnizim me barna. Po ashtu ka premtuar investime përgjatë lumenjve të Mitrovicës dhe mbjelljen e 20 mijë drunjve brenda katër vjetëve.

Në kuadër të pikës Mitrovica e Zhvilluar, Tahiri ndër të tjera, ka planifikuar ndërtimin e një inkubatori për biznese të reja dhe start-up-e, që përfshin lëshim me qira të lira të lokaleve e mbështetje juridike e financiare për këto nisma ndërmarrësie. Gjithashtu në kuadër të kësaj pike hyn edhe mbështetja për bujqit me mjete financiare, pajisje pune, teknologji, ekspertizë dhe ndërtim të qendrave për grumbullim të qumështit, frutave, perimeve etj.

Në kuadër të shtyllës “Mitrovica Digjitale”, Tahiri ka paraparë krijimin e një platforme për monitorimin e projekteve në kohë reale. Ndërsa me “Mitrovica që Kujdeset dhe Mbron”, ai parasheh ndërtimin e shtëpisë së të moshuarve, përmirësimin e infrastrukturës për personat me aftësi të kufizuara dhe subvencionim  për të porsalindurit.

“Komuna do të ofrojë edhe subvencion prej 500 eurove për çdo fëmijë të porsalindur. Ky është një investim i drejtpërdrejtë në mirëqenien e familjeve dhe një nxitje për rritjen e natalitetit në komunën tonë”.

E në kuadër të pikës së fundit, Tahiri ka prezantuar planin e tij për kulturën dhe sportin, ku përfshihen përkrahja dhe organizimi i festivaleve, ekspozitave, krijimin e hapësirave për ekspozim dhe shfaqje, mbrojtje të objekteve të trashëgimisë. E në sport, Tahiri tha se subvencionimin e klubeve do ta lidhë me përfshirjen e fëmijëve nga mosha 5-15 vjeç.

Zgjidhjen e problemit të trafikut në Prishtinë, brenda 18 muajsh, e ka premtuar kandidati i PDK-së për kryetar të komunës, Uran Ismaili.

“Ne do të rrisim numrin e semaforëve nga 20 sa janë aktualisht, në 80. Vendosja e 60 semaforëve shtesë nuk ka për qëllim të rrisë kohën e pritjes së shoferëve, përkundrazi, bashkë me krijimin e Qendrës së Menaxhimit të Trafikut do të sigurojë lëvizje më të shpejtë e më të rregullt. Për herë të parë Prishtina do të ketë një qendër të tillë që monitoron në kohë reale kushtet e trafikut dhe reagon menjëherë në rast të bllokimeve apo aksidenteve”, ka thënë Ismaili.

Në Gjilan, kandidati i PDK-së, Riad Rashiti, ka prezantuar planin e tij për mirëqenie sociale, ku, ndër të tjera, ka premtuar mbështetje për nënat e fëmijëve me aftësi të kufizuara.

“Funksionalizimi i ‘Fshatit të Lumtur’; Subvencionimi i fëmijëve me aftësi të kufizuara (nën 18 vjet) 100 euro çdo muaj; Mbështetje financiare 200 euro çdo muaj për nënat e fëmijëve me aftësi të kufizuara nën 18 vjet; Krijimi i fondit emergjent për nevojat e papritura të rasteve nën menaxhim nga QPS; Sigurimi i pajisjeve shkollore, veshmbathjeve etj, për fëmijët e familjeve përfituese të asistencës; Subvencionim i familjeve strehuese dhe nënave vetushqyese; Rritje e fondit për mbështetje me pako ushqimore për përfitues të asistencës sociale; Subvencionimi i punësimit të personave me aftësi të kufizuara; Qasja në informacion për personat e shurdhër; Forcimi i bashkëpunimit qendër për punë sociale-prind-kujdestar-shkollë; Krijimi i task-forcave profesionale për ndihmë psiko-sociale për fëmijët në konflikt me ligjin e përdoruesit e substancave psiko-aktive; Vëmendje e ndihmë institucionale e përhershme për viktimat e trafikimit, krimeve seksuale, dhunës në familje, të moshuarve pa përkujdesje dhe kategorive të tjera në gjendje të nevojës sociale; Ndërtimi i shkollës burimore regjionale”, ka thënë Rashiti.

Ndërtimin e “Rrugës së Verës” e ka premtuar kandidati i PDK-së për Rahovecin, Edon Cana, në kuadër të planit të tij për turizëm rural.

“Ky vizion do ta bëjë Rahovecin motor të zhvillimit ekonomik dhe qendër të agroturizmit në Kosovë, me: Investime prej 15 milion € për turizëm rural në 10 vjetët e ardhshëm nga komuna; Rrugën e Verës si bosht kryesor për vizitorët dhe zhvillimin e agroturizmit; Rigjenerim urban të qytetit të vjetër dhe investime në pikat kryesore turistike e kulturore; Modernizim të bujqësisë me ujitje, infrastrukturë moderne dhe përpunim të produkteve; Lidhje direkte me autostradën për transport e logjistikë më të lehtë; Mbështetje për kooperativa bujqësore dhe treg të përhershëm për prodhime vendore”, ka deklaruar Cana.

Në Ferizaj, kryetari Agim Aliu, njëherësh kandidat për një mandat të ri, ka njoftuar për fillimin e asfaltimit të rrugës që lidh fshatin Surqinë me Prelezin e Muhaxherëve.

“Nisi asfaltimi i rrugës kryesore të fshatit Surqinë, arterie rrugore 2-kilometërshe që zhvillon të gjithë zonën dhe lehtëson qarkullimin e banorëve, duke lidhur këtë fshat edhe me Prelezin e Muhaxherëve”, ka thënë Aliu.

Në Prizren, kryetari aktual, Shaqir Totaj, që garon për mandatin e dytë, ka thënë se ka nisur asfaltimi i rrugëve dhe rrugicave në lagjen “Kurilla”.

Çeku për Ramën: Punët e katër vjetëve po mundohet t’i kryejë për katër javë

Kandidati i Lëvizjes Vetëvendosje për kryeqytetin, Hajrulla Çeku, ka dhënë një varg zotimesh për lagjet e Prishtinës pas një vizite në Kolovicë. Çeku ka thënë se shkolla e braktisur në këtë lagje do të funksionalizohet. Ka premtuar ndriçim publik me llamba të sistemit LED, vendosje të kamerave publike për përforcim të sigurisë, rregullim të asfaltit e trotuareve dhe vendosje të shenjave të komunikacionit. Çeku ka thënë se me programin e tij, lagjet e Prishtinës do të kenë kartela, me të cilat do të vendoset bashkë me qytetarët për investime.

“Shkolla e braktisur do të kthehet në funksion për komunitetin, sipas nevojave që ata i kanë. Ndriçimi publik do të instalohet në të gjitha rrugët e lagjes, me sistem efikas LED që kursen energji dhe rrit sigurinë. Siguria do të përforcohet me vendosjen e kamerave publike dhe bashkëpunim të rregullt me patrullat e policisë komunale. Infrastruktura rrugore do të rregullohet me asfaltim, trotuare për këmbësorë dhe vendosje të shenjave të komunikacionit”, ka thënë ai.

Çeku ka kritikuar kryetarin aktual, Përparim Rama, që është kundërkandidat i tij në garën e 12 tetorit, se në prag të zgjedhjeve ka nisur improvizimet për zgjidhjen e problemeve në Prishtinë.

“Ky punët e katër vjetëve po mundohet t’i kryejë për katër javë. Me gjasë po mendon që njerëzit janë të pamençur”, ka thënë Çeku.

Gjuhë më të ashpër për kundërshtarët politikë ka përdorur kandidati për Mitrovicën, Faton Peci. Ai ka thënë se ky qytet nuk u nënshtrohet horrave shpifës, kriminelë e faqezi. Kësisoj kërkoi votë për të në zgjedhjet e 12 tetorit, për t’i dhënë fund, siç tha, qeverisjes me dështake në histori.

“Nuk ka askush që mundet me e ndalë fitoren në Mitrovicë. Mos u dorëzoni nga propaganda e ulët deri më datën 12 tetor. Jam i Mitrovicës dhe do të vdes i Mitrovicës, po vij për shkak se e dua Mitrovicën dhe për shkak se jam i gatshëm gjithçka të jap për të”, është shprehur Peci.

Edhe në Junik, kandidati i Vetëvendosjes, Jetmir Tofaj, kërkoi besimin e qytetarëve, duke thënë se kundërkandidatët e tij e kanë dëshmuar në qeverisje se e kanë lënë prapa këtë komunë.

“Në vend se të flasim për inteligjencë artificiale, ne ende duhet të merremi me problemet e ujit të pijes. Në vend se të flasim për elektrifikim të bjeshkëve të Junikut dhe për ndërtim të resorëve atje, ne ende duhet të merremi me impiantin e ujërave të zeza që nuk funksionon dhe me kanalizimet në qytetin tonë. Juniku ua dha shansin historik dy kundërkandidatëve që t’i dëshmojnë premtimet e tyre me punë, por kjo nuk funksionoi”, ka thënë Tofaj.

Kandidati për Ferizajn, Enver Haliti, ka premtuar mbështetjen e grave, sidomos atyre në biznes përmes granteve dhe subvencionimit të kamatave për kreditë investuese.  Ndërkaq për nënat që punojnë ose synojnë punësimin ka thënë se do t’ua lehtësojë vështirësitë e kujdesit për fëmijët me ndërtimin a funksionalizimin e 10 çerdheve të reja publike në qytet dhe në fshatra.

Për gratë ka dhënë premtime edhe kandidati për Malishevën, Valon Hoti. Ai ka thënë se do të krijohen edhe vende pune për to dhe trajnime profesionale e në qeverisjen lokale u zotua se gratë do të kenë zë të barabartë dhe përfaqësim të drejtë.

“Do të themelojmë punëtorinë artizanale që të krijojë mundësi të reja dhe vende të punës për gratë  e Malishevës. Gratë do të aftësohen me profesione konkrete dhe kualifikime adekuate të përshtatura për vendin e punës. Do të sigurojmë që gratë të kenë zë të barabartë dhe përfaqësim të drejtë në të gjithë mekanizmat e pushtetit lokal, në drejtoritë komunale, në shkolla dhe në të gjitha pozitat udhëheqëse”, ka thënë Hoti.

Latifi premton spërkatjen e vreshtave me dronë

Fushata e kandidatëve të Aleancës për Ardhmërinë e Kosovës të premten

Kryetari dhe kandidati që synon edhe një mandat për Komunën e Suharekës, Bali Muharremaj fushatën e ka vazhduar me një takim me rininë e kësaj komune.  Ka premtuar projekte në vlerë prej 28 milionë eurosh, të cilat tha se do të përmbushin  nevojat e qytetit për shkolla, çerdhe, infrastrukturë dhe një zonë industriale.

Në Pejë, kandidati i AAK-së për kryetar komune, Ali Berisha, është zotuar se nëse rikthehet në krye të komunës do ta bëjë rregullimin e projektit infrastrukturor nga Gorazhdeja deri te stacioni i trenit me katër korsi, e menaxhim më efikas të buxhetit komunal.

Smajl Latifi në Rahovec, i cili synon edhe një mandat ka premtuar ndërtimin e 150 kilometrave rrugë të reja dhe futjen e dronëve për spërkatjen e vreshtave dhe kulturave bujqësore. Sipas Latifit  ky do të jetë projekti i pari i këtij lloji në Kosovë.

“Unë ju zotohem këtu se në Komunën e Rahovecit do të ndërtohen 150 km rrugë të reja fushore dhe do të ketë mirëmbajtje të rrugëve ekzistuese. Partneriteti mes Agrocelinës, Komunës së Rahovecit dhe fermerëve do të zgjerohet, do të thellohet dhe do të mbështetet edhe më shumë financiarisht. Ju kam premtuar një projekt që nuk ka ndodhur asnjëherë në historinë e Kosovës pas luftës, por që mund të ndodhë dhe do të ndodhë në komunën tonë: do të blejmë një shërbim të specializuar për spërkatjen e kulturave bujqësore, vreshtave dhe perimeve përmes dronëve”, ka thënë Latifi.

Ndërsa kandidati për Prishtinë, Bekë Berisha, ka paraqitur shtatë prioritete, që përfshijnë arsim modern, shëndetësi funksionale, transport publik me autobusë të rinj, siguri në lagje, mbështetje për bizneset e reja dhe hapësira për kulturë e sport për të rinjtë.

“Kam qenë në çdo lagje të Prishtinës, i kam dëgjuar problemet dhe kërkesat e qytetarëve, dhe jam ulur e jam konsultuar me ekspertë për secilën fushë. Shtatë prioritete të qarta, me zgjidhje konkrete që prekin jetën e çdo qytetari: Arsim modern, me fëmijë të lirë, por të sigurt, me siguri inteligjente. Higjienë dhe kushte të dinjitetshme. Shëndetësi që respekton dinjitetin, me ambulanca funksionale dhe kujdes të afërt për secilin pacient. Rrugë dhe transport që funksionojnë, me infrastrukturë moderne dhe autobusë të rinj për nxënësit. Ekonomi që hap vende pune, duke mbështetur bizneset e reja që duan të ndërtojnë të ardhmen këtu. Siguri dhe administratë efikase, me shkolla të sigurta dhe lagje të ndriçuara. Kulturë dhe sport për rininë, me hapësira të reja dhe mbështetje për talentet tona. Një Prishtinë e pastër dhe me menaxhim të duhur të mbeturinave”, u shpreh Berisha.

Për Azemin prioritet do të jetë arsimi, Shehu premton palestër sportive

Fushata e kandidatëve të Lidhjes Demokratike të Kosovës të premten

Kandidati i Lidhjes Demokratike të Kosovës për Prishtinë, Përparim Rama, ka njoftuar se tashmë kryeqyteti ofron qasje në trajnime falas për më shumë se 3 mijë familje. Përmes një videoje të shpërndarë në rrjetet sociale, ai njoftoi gjithashtu se së shpejti do të finalizohet biblioteka e parë për fëmijë në kryeqytet.

“Për herë të parë në kryeqytet, më shumë se 3000 familje kanë qasje në trajnime falas. Klasat për nëna, kujdes në grup, edhe vizita të rregullta nga profesionistë në shtëpi. Po krijojmë në brez të ri prindërish të përgatitur dhe fëmijë të rritur më mirë. Prishtina përtej improvizimit”, u shpreh Rama.

Kandidati për kryetar të Fushë-Kosovës, Besnik Osmani, është zotuar se në mandatin e tij do të themelojë Muzeun Komunal të Luftës, do të vendosë shtatore të reja për dëshmorët dhe do të krijojë një zyrë të veçantë, e cila, sipas tij, do të ketë mandat specifik për avancimin e vlerave të luftës. Këto zotime Osmani i bëri të premten gjatë një takimi me udhëheqësit e shoqatave të dala nga lufta.

Në Mitrovicë, kandidati për kryetar, Gëzim Plakolli, është zotuar se nëse fiton mandatin, prioritet do t’i këtë pensionistët. Gjatë takimit me Federatën e Sindikatave të Pensionistëve dhe Invalidëve të Punës së Kosovës, Plakolli prezantoi edhe programin e tij katërvjeçar.

Ndërtimin e një oborri riciklues të mbeturinave, pishinë gjysmolimpike, palestër të mbyllur sportive dhe sheshin qendror “Edmond Hoxha”, janë disa nga projektet që ka premtuar t’i realizojë kryetari aktual i Junikut, Ruzhdi Shehu, nëse fiton edhe një mandat tjetër.

Ndërsa në Ferizaj, Visar Azemi, tha se nëse i besohet mandati katërvjeçar, arsimi do të jetë prioritet kryesor.

“Çka kemi me bo? Do të vendosim kujdestar sigurie pranë shkollave që fëmijët tanë të jenë të sigurt. Do të ofrojmë shujta të ngrohta për çdo nxënës. Mësimin tërëditor në shkollat e Ferizajt dhe krijimin e librave shkollorë sportivë do ta kemi prioritet. Do t’i modernizojmë shkollat, 500 klasa do të kenë tabela digjitale”, ka thënë ai.

Rashiti premton 200 euro për nënat e fëmijëve me aftësi të kufizuara

Riad Rashiti, kandidat për kryetar të Gjilanit

Fushata e kandidatëve të Partisë Demokratike të Kosovës të premten

Zgjidhjen e problemit të trafikut në Prishtinë, brenda 18 muajsh, e ka premtuar kandidati i Partisë Demokratike për kryetar të komunës, Uran Ismaili. Ai ka thënë se do të katërfishohet numri i semaforëve në qytet, e do të krijohet edhe një qendër për menaxhimin e tyre, sipas nevojave të trafikut.

“Për herë të parë Prishtina do të ketë një qendër të tillë që monitoron në kohë reale kushtet e trafikut dhe reagon menjëherë në rast të bllokimeve apo aksidenteve. Kjo qendër do të rregullojë në mënyrë automatike kohën e semaforëve. Do të menaxhojë fluksin e automjeteve në Prishtinë dhe në hyrjet e Prishtinës. Do të koordinohet me policinë dhe shërbimet e emergjencës në rastet e nevojshme për reagim të shpejtë”, ka thënë Ismaili

E planin e tij për mirëqenien sociale e ka prezantuar Riad Rashiti, kandidat për kryetar të Gjilanit. Ai është zotuar që nënat e fëmijëve me aftësi të kufizuara do të përfitojnë mbështetje mujore prej 200 eurosh.

Ndërtimin e “Rrugës së Verës” e ka premtuar Edon Cana, kandidati i PDK-së për Rahovecin, në kuadër të planit të tij për turizëm rural. Ai ka thënë se në këtë sektor, për 10 vjet do të investohen 15 milionë euro.

Agim Aliu, kryetar i Ferizajt, njëkohësisht kandidat edhe për një mandat, njoftoi për fillimin e asfaltimit të rrugës që lidh fshatin Surqinë me Prelezin e Muhaxherëve.

E asfaltimi i rrugëve dhe rrugicave nisi edhe në Lagjen Kurilla të Prizrenit. Kryetari Shaqir Totaj, kandidat për mandatin e dytë, tha se do t’ia ofrojë kujdesin e merituar kësaj lagjeje.

“Kemi filluar me një dinamikë të shtuar dhe punët po shkojnë mirë, sepse kjo lagje meriton përkujdesje, meriton përmirësim të standardit të jetës dhe ne pikërisht po e bëjmë këtë, duke e përcaktuar që kjo lagje do të jetë edhe në të ardhmen një nga prioritetet tona”, u shpreh ai.

Peci: Jam i Mitrovicës dhe do të vdes i Mitrovicës, mos u dorëzoni nga propaganda

Fushata e kandidatëve të Lëvizjes Vetëvendosje të premten

Kandidati i Lëvizjes Vetëvendosje për kryetar të Prishtinës, Hajrulla Çeku, ka dhënë një varg zotimesh për lagjet e Prishtinës, pas një vizite në Kolovicë. Ai ka thënë se shkolla e braktisur në këtë lagje do të funksionalizohet. Ka premtuar ndriçim publik me llamba të sistemit LED, vendosje të kamerave publike për siguri më të madhe, rregullim të asfaltit e trotuareve dhe vendosje të shenjave të komunikacionit. Çeku ka kritikuar kryetarin aktual, Përparim Rama, që është kundërkandidat i tij në zgjedhjet e 12 tetorit, se në prag të zgjedhjeve ka nisur improvizimet për zgjidhjen e problemeve në Prishtinë.

“Ky punët e katër vjetëve po mundohet me i kry për katër javë. Me gjasë po mendon që njerëzit janë të pamençur”.

Gjuhë më të ashpër për kundërshtarët politikë ka përdorur kandidati për kryetar të Mitrovicës, Faton Peci. Peci sot vizitoi edhe klubin e futbollit, Trepça ’89, ku premtoi mbështetje të madhe për sportin.

“Nuk ka askush që mundet me e ndalë fitoren në Mitrovicë. Mos u dorëzoni nga propaganda e ulët deri më datën 12 tetor. Jam i Mitrovicës dhe kam me vdekë i Mitrovicës, po vij për shkak se e dua Mitrovicën dhe për shkak se jam i gatshëm gjithçka të jap për të”.

Edhe në Junik, kandidati i Vetëvendosjes për kryetar, Jetmir Tofaj, bëri akuza për kundërkandidatët.

“Në vend se të flasim për elektrifikim të bjeshkëve të Junikut dhe për ndërtim të resorëve atje, ne ende duhet të merremi me impiantin e ujërave të zeza që nuk funksionon dhe me kanalizimet në qytetin tonë. Juniku ua dha shansin historike dy kundërkandidatëve që t’i dëshmojnë premtimet e tyre me punë, por kjo nuk funksionoi”.

Ismaili: Për 18 muaj e zhbllokojmë trafikun e Prishtinës

Kandidati për kryetar të Prishtinës, Uran Ismaili, është zotuar se për 18 muaj do ta zhbllokoje trafikun në Prishtinë. 

Ai të premten ka mbajtur një konferencë për media, ku ka prezantuar planin e tij për zhbllokimin e trafikut në kryeqytet. 

Ismaili ka thënë se “kaosi i trafikut është kthyer në një urgjencë që nuk mund të presë më dhe se pas 12 tetorit qytetarët do të shohin ndryshimin e shumëpritur”.

“Çdo ditë qytetarët e Prishtinës humbin orë të tëra në kolona, duke shpenzuar kohë, para dhe energji. Ky problem nuk prek vetëm lëvizjen, por edhe ekonominë, shëndetin dhe cilësinë e jetës sonë”, ka deklaruar Ismaili.

Si pjesë e planit të tij për zhbllokimin e trafikut brenda 18 muajve, Ismaili ka prezantuar dy nga masat që do të ndërmerren. 

“Vendosja e 60 semaforëve të rinj, duke rritur numrin total nga 20 sa janë aktualisht në 80. Kjo, sipas tij, do të mbulojë të gjitha kryqëzimet kryesore, do të shmangë kaosin e përditshëm dhe do të mundësojë menaxhim më të mirë të rrjedhës së veturave. Qëllimi nuk është të shtojmë pritjet për qytetarët, por të krijojmë lëvizje më të shpejtë e më të organizuar. Krijimi i Qendrës së Menaxhimit të Trafikut, një qendër moderne që do të monitorojë në kohë reale kushtet e trafikut, do të menaxhojë fluksin e automjeteve në hyrjet e qytetit, si dhe do të koordinohet ngushtë me policinë dhe shërbimet emergjente për reagim të shpejtë”, ka deklaruar Ismaili.

Ai ka thënë se këto janë vetëm dy nga pikat e planit të plotë për të zhbllokuar trafikun në Prishtinë. Sipas tij ky plan mbështetet në hulumtime dhe praktika të rekomanduara nga ekspertët vendorë dhe ndërkombëtarë.

“Qëllimi ynë është i qartë dhe i matshëm: brenda 18 muajve, Prishtina do të jetë qytet pa kolonat e përditshme, me lëvizje të rregullt dhe me respekt për kohën e secilit qytetar. Ka ardhur koha për një qeverisje që i jep fund improvizimeve dhe që sjell zgjidhje të prekshme”, ka deklaruar Ismaili.

Shahini premton qendra komunitare për pensionistët

Kandidatja e PSD-së për kryetare të Prishtinës, Besa Shahini, u ka premtuar pensionistëve qendra komunitare e programe vullnetare. 

Ajo ka thënë se kjo kategori ka vend të rëndësishëm në programin qeverisës të saj.

“Pensionistët zënë një vend të rëndësishëm në programin tim qeverisës. Prej krijimit të qendrave komunitare në lagje deri te programet vullnetare ndërbrezorë janë punë të cilat do të inicohen me prioritet. Këtë nevojë e shprehën edhe gratë në shoqatën "Rreze Jete". Përveç shëndetit që dobësohet, ku më shumë e ku më pak, mosha e tretë problem kryesor sot, në botë dhe te ne, ka vetminë. Anadaj vendet si këto, ku gratë ndajnë përvojat dhe përditshmëria, në solidaritet dhe afërsi, janë edhe thelbi i asaj nga çfarë duhet të përbëhet komuniteti”, ka shkruar Shahini në Facebook.