BE kërkon zbatim më efikas të projekteve të IPA-s në Kosovë

Në Prishtinë është mbajtur takimi vjetor i Komitetit Monitorues të Instrumentit të Asistencës së Para-Anëtarësimit (IPA), i bashkëkryesuar nga koordinatori kombëtar për IPA-n, Florim Canolli, dhe Shefi i Njësisë për Kosovën dhe Serbinë në Drejtorinë e Përgjithshme të Komisionit Evropian për Zgjerim dhe Fqinjësinë Lindore, Jiri Plecity.

Takimi mes përfaqësuesve të Kosovës dhe Komisionit Evropian u fokusua në zbatimin e mbështetjes financiare dhe teknike të Bashkimit Evropian në kuadër të IPA-s, si dhe në avancimin e reformave që lidhen me procesin e integrimit evropian të Kosovës.

Gjatë diskutimeve u trajtuan sfidat horizontale dhe progresi i përgjithshëm në zbatimin e mbështetjes së BE-së në sektorë të ndryshëm, duke përfshirë kriteret politike dhe ekonomike për integrim evropian.

Fokus i veçantë iu kushtua sundimit të ligjit, reformës së administratës publike, reformave strukturore, zhvillimit të sektorit privat, kapitalit njerëzor dhe shoqërisë gjithëpërfshirëse.

Në takim u shqyrtuan gjithashtu investimet e BE-së në Kosovë përmes Kornizës së Investimeve për Ballkanin Perëndimor (WBIF) dhe programeve të Bashkëpunimit Ndërkufitar (CBC).

Të dyja palët theksuan rëndësinë e zbatimit, monitorimit dhe përcjelljes efektive të asistencës së BE-së, thuhet në komunikatën e Kryeministrisë për takimin. 

E, Komisioni Evropian theksoi nevojën për zbatim në kohë të projekteve të dakorduara, në mënyrë që mbështetja e BE-së të sjellë përfitime konkrete për qytetarët dhe bizneset. U theksua gjithashtu se disa projekte kërkojnë veprime të menjëhershme nga institucionet përkatëse për të siguruar realizimin e tyre dhe avancimin e reformave kyçe.

“Kosova riafirmoi zotimin për monitorim të afërt të zbatimit të projekteve dhe vazhdimin e reformave të mbështetura nga Bashkimi Evropian”, përcolli ZKM.