Trumpi niset për në Pekin mes tensioneve lidhur me Iranin

Presidenti i Shteteve të Bashkuara të Amerikës, Donald Trump, pritet të niset të martën për në Kinë për t’u takuar me presidentin Xi Jinping, pas javësh përpjekjesh të pasuksesshme për të bindur qeverinë kineze që të përdorë ndikimin e saj të konsiderueshëm për ta shtyrë Iranin të pranojë kushtet amerikane për t’i dhënë fund luftës dymujore, ose të paktën për të rihapur Ngushticën strategjike të Hormuzit.

Trumpi njëherë ka kritikuar se Kina, blerësi më i madh në botë i naftës iraniane, nuk ka bërë mjaftueshëm për ta vënë Republikën Islamike në vijë, e pastaj ka pranuar se qeveria e Xi-së ndihmoi në uljen e tensioneve muajin e kaluar duke e shtyrë Teheranin të rikthehej në bisedimet e armëpushimit, kur negociatat po lëkundeshin.

Megjithatë, përpara vizitës së rëndësishme të liderit amerikan, Shtëpia e Bardhë ka ulur pritshmëritë se Trumpi do të arrijë të bindë Xi-në të ndryshojë qëndrimin e Kinës.

Në vend të kësaj, administrata amerikane duket e vendosur që të mos lejojë që mosmarrëveshjet për Iranin të errësojnë përpjekjet për të bërë përparim në çështje të tjera të vështira në marrëdhënien e ndërlikuar mes dy vendeve, duke filluar nga tregtia deri te bashkëpunimi i mëtejshëm i Kinës për të bllokuar eksportet e përbërësve pararendës të fentanylit.

“Nuk duam që kjo çështje të bëhet diçka që pengon marrëdhënien më të gjerë apo marrëveshjet që mund të dalin nga takimi ynë në Pekin,” tha javën e kaluar në Bloomberg, përfaqësuesi Amerikan i Tregtisë, Jamieson Greer.