Pak pritje që Ligji për çmimet tavan mund të ketë efekt

Frenimin e rritjes së çmimeve në këtë kohë krize, profesorë të ekonomisë e drejtues të shoqatës “Konsumatori” thonë se nuk mund ta ndalë Ligji për çmimet tavan që ka marrë aprovimin e Qeverisë, por ende jo të Kuvendit. Sipas tyre, heqja e akcizës dhe TVSH-së për derivate do të ishte lëvizje e duhur e Qeverisë në këtë kohë

Rritja e çmimit të naftës, e nxitur nga përshkallëzimi i luftës në Iran, ka prodhuar një efekt zinxhir në treg, duke çuar në shtrenjtimin e produkteve bazë të konsumit.

Në tregun e Kosovës, një kilogram speca ka shkuar deri në 6 euro, ndërsa për një kilogram domate qytetarët duhet të paguajnë deri në 4 euro.

Sipas qytetarëve, kjo ngritje e çmimeve është bërë e papërballueshme.

“Unë bajagi i frekuentoj edhe marketet, edhe tregun, më të shtrenjta janë çmimet në treg se në markete. Marketet po marrin aksione nganjëherë dhe po bien çmimet, e sot e pashë domatja e zezë pesë euro një kilogram, për ne është e papërballueshme. Në përgjithësi çmimet janë shumë të larta në krahasim me të ardhurat te ne në Kosovë si janë”, ka thënë Hasan Shala, qytetar.
Njëjtë janë shprehur edhe Enver Shabani e Ismet Jakupi.

“Zor po i përballojmë, por edhe këta nuk kanë faj”, ka thënë Shabani. “Për pensionistët është mjaft vështirë, se me 150 euro çka me ba”, ka shtuar Jakupi.

Qeveria e Kosovës së fundmi ka miratuar Projektligjin për çmimet tavan, me të cilin synohet stabilizimi i çmimeve të konsumit, por ai nuk është miratuar ende në Kuvendin e Kosovës për të hyrë në fuqi.

E sipas Shoqatës së Konsumatorëve, nga ky ligj nuk mund të priten rezultate pozitive.

“Ne kemi përvoja shumë të liga me ligjet, zbatueshmëria e ligjeve në Republikën e Kosovës është akoma nën 40% dhe në këtë klimë zbatueshmërie të ligjeve, çfarë mund të presim nga ky ligj? Nuk mund të presim asgjë”, ka thënë Selatin Kaçaniku, kryetar i organizatës “Konsumatori”.
Edhe profesori i ekonomisë, Shkumbin Misini, ka thënë se ky ligj nuk e zgjidh problemin.

Misini është shprehur se heqja e akcizës dhe TVSH-së do të ishte lëvizje e duhur në këtë kohë nga ekzekutivi.

“Mirëpo faktori i dytë është faktori i Qeverisë, për shkak se Qeveria po nxit prodhimin e inflacionit duke mos e hequr akcizën. Shumica e vendeve më të zhvilluara të botës kanë bërë lëvizje në akcizë, i vetmi vend është Kosova që nuk ka bërë një lëvizje të tillë. Kjo lë me nënkuptuar që kryeministrit nuk i intereson heqja e akcizës, por i intereson mbushja e buxhetit, aq sa ka mjetet financiare marramendëse në buxhet. Dhe me mburrje po thotë që buxheti i Kosovës do të arrijë në 5 miliardë ose diçka e tillë, dhe këto mjete financiare po i merr në sasi paraje”, ka thënë Misini.

Ai ka thënë se në markete kanë lëvizur çmimet mbi 20% te të gjitha produktet.

Në muajin shkurt të këtij viti, inflacioni sipas Agjencisë së Statistikave të Kosovës ishte 6 për qind.