"Dashni e vjetër" e ka çuar Armend Rexhepagiqin edhe në Ulqin. Në një koncert organizuar nga Komuna e Ulqinit dhe Organizata Turistike e Ulqinit, kantautori i njohur ka performuar live rrëzë Kalasë, dhe kjo ka qenë hera e parë e tij në këtë qytet bregdetar.
Ai një nga këngët ia ka dedikuar babait të tij të ndjerë, Jashar Rexhepagiqi.
"Është hera e parë që këndoj në vendlindjen e tij në Mal të Zi", ka thënë Rexhepagiqi.
Për një orë e 15 minuta, ai ka sjellë disa prej hiteve të tij në një format koncerti të atij në Prishtinë, me orkestrën drejtuar nga maestro Edon Ramadani.